ගැබිනි අම්මලාට දෙන දානය ගැන සිතන්නට යමක්

views 2018-11-08 12:13:00 mother_New

ඉහත මාතෘකාව සම්බන්ධයෙන් මගේ අත්දැකීම් බේදා ගැනිමටත් , මාගේ පෞද්ගලික අදහස් ඔබගේ සංවාදයට යොමු කිරීමටත් කැමත්තෙන් මෙසේ ලියමි .

“මම බබා ලැබෙන්න ඉන්න කොට මගේ ගමේ මාසික සායනයට ගියා. එහිදී යුවලක් අපිට කිරිබත් කෑලි දෙකක් , ලුණු මිරිස් සහ කෙසෙල් ගෙඩියක් ලබා දුන්නා. මේරූ දරු ගැබක් ඇතිව බඩගින්නේ සිටි මටත් කටට කෙළ ඉනුවා. පින් දී මෙය ලබා ගෙන හොඳට සැදී පැහැදී පළමු කිරිබත් කට කෑවා. අයියෝ ලුනු බින්දුවක් වත් නෑ. මගේ කෑම පිරිය නැති වුනා. නමුත් ඔවුන්ට පෙනෙන්න මෙය ඉවත දැමීමට මට සිත දුන්නේ නෑ. ඔවුන් පව්. පිනක් සිදු කරන්න නේ මේ දේ කලේ. ඒ නිසා අපහසුවෙන් එය කා අවසන් කර කෙසෙල් ගෙඩිය (අමුවෙන් නමුත්) කා දැමුවා. මම බෞද්ධ අම්මා කෙනෙකු ලෙස අපේ බුදුරදුන් ගේ අනුශාසනා ගැන මෙනෙහි කල නිසා එය කරුණාවෙන් අමතක කලා …”

නමුත් ටිකක් හිතන්න… ඔවුන් උදේ පාන්දර සිට ඉතා මහන්සියෙන් මේ දේ සකසන්ට ඇති. සමහරවිට මේක දිය යුතු, කල යුතු වැඩක් ලෙස සලකා ඔහේ කරන්නටත් ඇති. මට හිතා ගන්න අපහසු වුණේ මොවුන් හදන එකම එක කිරි බතේ රස නොබලා මේසා ප්‍රමාණයක් හැදුවේ කෙසේද යන්නයි.

අපි ගැබිනි මව් වරුන්ට දාන දීමට යොමුවන්නේ ඇයි ? ගැබිනි මවක් යනු, ගැහෙන පණක් ජීවයෙන් පුරවමින් සිරුර තුල දරා ගනිමින් , වෙනදාට වඩා අපහසුතාවයන් මධ්‍යයේ ජිවත් වන තවත් ප්‍රාණයක්. ඔවුන්ගේ කුස පිනවීම ඉතා පිනක්. දරුවන් අපේක්ෂාවෙන් ඉන්න කාන්තාවන් තමන්ට ඉක්මන් දරු පල පතමින්ද , දරුවන් ලබන්න සැරසෙන මව්වරු , පහසුවෙන් දරුවා ලැබීමේ අරමුණින්ද , තවත් අය , තවත් දානමය පුණ්‍ය කර්මයක් ලෙසින් ද මෙවන් කාර්යයන් සවිධානය කරනු ලබයි. මෙවන් දානමය පින්කම් සදහා දිය හැකි දේවල් බොහෝය.

    ආහාර පාන
    ඇඳුම් පැළදුම්
    අලුත උපන් දරුවන් ට අවශ්‍ය ද්‍රව්‍ය (නැපි , ඩයපර් , ක්‍රීම් , සබන් )
    ඖෂධ
    මව් සහ ළදරු සායනයන් වල පවතින අඩුපාඩු සැකසීම

ආහාර පාන සම්බන්ධයෙන් නම් විශේෂයෙන් මම සදහන් නොකරමි මන්ද එය සැම දෙනම දන්නා දෙය විමයි. අමුතුවෙන් සදහන් කල යුත්තේ එය ඉතා සැලකිල්ලෙන් සහ ඕනෑකමින් සකසන්න කියා යි. එවිට මට වන් අත්දැකීම් වෙනත් අම්මලාට නොලැබෙන බැවිණි. බඩ දරු අම්මා කෙනෙක්ට සිත් සතුටු වීම සහ කුස ගිණි නිවීමට හදන කෑම ඉතා රසට හදන්න. වෙනදාටත් වඩා රසට හදන්න. එය ලොකු පිනක්.

ගැබිනි මව සදහා ඇඳුම් පැළදුම් ,අලුත උපන් දරුවන් ට අවශ්‍ය ද්‍රව්‍ය (නැපි , ඩයපර් , ක්‍රීම් , සබන් ) පිලිබදවත් ඔබ කරුණු කාරණා දන්නා බැවින් විශේෂ වශයෙන් ඒ ගැන නොලියමි. මිට අමතරව මෙවන් දානමය කටයුතු වලට යොදාගත හැකි වෙනත් දේ තිබේනම් මේ ලිපිය යටින් කමෙන්ටුවක් තබා යනමෙන් ඉල්ලමි.

ඒ වගේම ගැබිනි මව්වරුන්ට හැමදාම ගත යුතු බෙහෙත් පෙති වලට අමතරව විශේෂ වශයෙන් වෛද්‍යවරයෙකු විසින් සදහන් කල ඖෂධ වේ නම් එවන් දේ ද විමසා බලා ලබා දීමටද ඔබට පුළුවන් නේද ?

මම මේ ලිපියේ විශේෂයෙන් සඳහන් කරන්නට බලපොරොත්තු වූ කාරණය නම් මා අවසන් වශයෙන් සදහන් කල කාරණාවයි. එය බොහෝ අයට අලුත් කාරණාවක් විය හැකියි. මන්ද ගමේ මාතෘ හා ළමා සායනය පරිපාලනය හා නඩත්තුව සිදු කරන්නේ රජය විසින් බැවිනි. නමුත් යම් අඩුපාඩුවක්  සපුරා ගැනීමට ඉතා දිගු කලක් බලා සිටිමට සිදුවන බවත් , බොහෝවිට රජයෙන් ලබා දෙන විසදුම් කඩිනම් නොවන බවත් අපට රහසක් නොවේ. සමහර අඩුපාඩු කම් නිසා මව්වරු ,දරුවන් මෙන්ම පවුල් සෞක්‍ය සේවා නිලධාරීන් ද සායනයේ වෛද්‍ය වරුද ඉතා අපහසුතාවන්ට ලක්වන බව අපට කොතෙකුත් දක්නට ලැබෙයි. රජයට දොස් නගමින් සිටිනවාට වඩා මොවුන්ගේ සුභ සිද්ධිය තකා යම් අඩුපාඩුවක් සකසා දීමට තරම් කරුණාවන්ත හදවත් ඇත්තන් ඕනෑ තරම අද සිටින අතර අපගේ යුතුකම මේවා පිළිබඳව ඔවුන්ගේ අවධානය යොමු  කරවීමයි. සියල්ල්ටම පෙර මවිසින් අපේ ගමේ සායනය උදෙසා සුළුවෙන් හෝ සිදුකල උපකාර කීපයක් සදහන් කරන්නේ ඔබට යම් අදහසක් ගැනීමටයි.

අපේ සායනයේ එක සුළු ප්‍රදේශයක් ගැඹුරු ඇළක් දෙසට විවුර්ත වී තිබු අතර, එම ප්‍රදේශය භාවිතා කෙරුනේ දරුවන්ට එන්නත් ලබා දීමෙන් පසු විනාඩි 20 ක් පමණ රැදී සිටීම සදහායි. දරුවන් ට එම ස්ථානය ආරක්ෂාකාරීව ගැවසීමට පහසු වීම සදහා එම සුළු ප්‍රදේශය දැලකින් ආවරණය කිරිමට මම අවශ්‍ය දේ ලබා දුන්නා. පවුල් සෞඛ්‍යය සේවා මහත්මීන් එය ඉතා කඩිනමින් සිදු කර ගත්තා. තවත් විටෙක මම ගැබිනි මව් වරුන්ගේ මුත්‍රා පරීක්ෂා කිරීමේ පටි පැකට්ටු කීපයක් ලබා දුන්නා. ඒවා නිතරම සායනයේ අවසන් වන නමුත් ළග තිබිය යුතු දෙයක් නිසා. වසර කිපයකට පෙර මෙම එක පටියක් දෙකට කපා අම්මලා දෙදෙනෙකුට භාවිතා කිරීමට පවුල් සෞඛ්‍යය සේවා මහත්මීන් ඉතා අරපරිස්සම් වූ අයුරු මට අද වගේ මතකයි. තවත් අම්මා කෙනෙකු , සායනයේ කැඩුණ රුධිර පීඩනය මනින උපකරණය වෙනුවට අලුත් එකක් ලබා දුන්නා. කැඩී තිබු සායන මේස 3 තවත් මව්වරු කීපදෙනෙක් එකතු වී සකසා දුන්නා. මෙම ලිපිය කියවන ඔබත් මෙවන් පින්කම් කර තිබේනම් මෙහි කමෙන්ට් කර අන් අයවත් දැනුවත් කරන මෙන් ඉල්ලා සිටිමි.

මෙම ලිපිය අවසන් කිරිමට මත්තෙන් තවත් දෙයක් ගැන ලිවිමට් මට සිත් පහල වුණි. මෙය කියවන ඔබ වියපත් මවක් වන්නට පිළිවන්. සොහොයුරිය වන්නට පුළුවන. ඔබගේ දුව හෝ ලේලිය ගැබ් ගෙනද? එසේනම් දවසක් මිඩංගු කර ඇය වෙනුවෙන් විශේෂ කෑම වේලක් ඔබේ අතින් සකසා දෙන්න. ඔබ ඇයට ආස කරන කෑම නිතර සකසා දෙන බව මම දන්නෙමි. නමුත් සම්පුර්ණ වේලක් ? මෙය විකාරයක් වගේ සිතෙන්නට පුළුවන් නමුත් එහිද යමක් සිතන්නට තිබේ. එක් සොහොයුරියක් ඇයට දරුවෙකු පතමින් අහල පහල ගැබිනි මව්වරුන්ට රසවත් බත් වේලක් සකසා යවන මුත් වෙනම ජිවත් වන කලක් තමාගේ සෙවනැල්ල වූ සිය ගැබ්බර නැගෙණිය ව අමතක කරයි. මන්ද ඇයට , තම නැගෙණිය දානය දිය යුතු අයෙකු ලෙස නොපෙනේ. මවක් තම දියණියට හෝ ලේලියට එසේ විශේෂ කෑමක් දීමට නොසිතන්නේ ද මේ නිසයි. පොඩි දෙයක් නමුත් සිතන්නට යමක් ….

​සිංහල ලිපි

සතියේ ලග්න පලාපල