ගෘහයට මුල්ගල් තැබීම ආවට ගියාට නොකල යුතුයි

views 2017-03-17 11:41:00 hplans_New

බක් මාසය මාර්තු 15 සිට අප්‍රේල් 15 දක්වා යෙදේ. මේ කාලපරාසය තුළ රවි රාශි චක්‍රයේ අවසාන රාශිය වූ මීන රාශියේ ගමන් කරයි. බක් මාසයේ කොතරම් සුබ දිනයක් තිබුණත් ගෘහකාර්ය සඳහා නැකත් දීමක් නොකරයි. මොනතරම් අවශ්‍යතා තිබුණත් කෝණහතර වන මිථුන, කන්‍යා, ධනු, මීනවල ගෘහ ආරම්භ කටයුතු අත්හළ යුතුයි. නොදන්නා අයට මේවා කියාදීමෙන් ලොකු පිනක් අත්වේ. ගෘහ ඉදිකිරීම් කරන අයද මේවා ගැන දැනීමක් ලබා ගැනීම ඉතා අවශ්‍ය කරුණකි.

සුබදශා, අතුරුදශා නොමැති විටෙක සුබ මුහුර්තයක් පිළියෙළ කරන්නේ කෙසේද?

පුද්ගලයාගේ වාසනා ශක්තියත්, අධිෂ්ඨාන ශක්තියත්, ආර්ථික තත්ත්වයත් සැලකිල්ලට ගෙන ගෘහයකට සුබ මුහුර්තයක් සාදන්නට ඉසිවරු උපදෙස් දී ඇත.

නිවසකට බහිරව පූජාවක් දෙන්නේ උදය වරුවේද? සවස් වරුවේද?

බහිරව පූජාව දීමේදී නිවසක් පමණක් නොව ඉඩමද ඊට ඇතුළත් විය යුතුය. සමහර වෙද මහවත්වරු තමුන්ගේ පහසුව තකා දහවල් දවසේ මෙම කටයුත්ත කරති. එහෙත් නිවැරදි ක්‍රමය තුන්යාමය අරඹා උදෑසන ඉර පායන්නට පෙර අවසන් කිරීමයි. එමනිසා සියල්ලම ලෑස්තිකර රාත්‍රී 10 පසුවී බහිරව පූජාව තැබිමයි නියම ක්‍රමය. එම නිසා බහිරව පූජාව තබා බහිරවයා සතුටුකොට ඔබගේ ජීවිතය සාර්ථක කරගන්න. ඇතැම්විට ශක්තිමත් මානසිකත්වයක් පවතින විට බාහිර බලපෑම් නැතිවීමටද පුළුවන.

මුල්ගලට ගන්නේ කළු ගල්වලින් සෑදු එකක්ද? එයට දමන්නේ මොනවාද?

පුරාණ ක්‍රමය අනුව දිග අඟල් 5 පළල් අඟල් 5, උස අඟල් 7, ගැඹුර අඟල් 7යි. මේ ආකාරයට කළුගලකින් සකස් කරගත යුතුය. මෙය ඉතා අසීරු කරුණකි. නමුත් නියමිත ක්‍රමය මෙය වේ.

වර්තමානයේදී මෙය සිමෙන්තිවලින් නිපදවනු ලබයි. ඔබ වෙළෙඳ ආයතනයකින් ගන්නා නිදන් වස්තු මංජුසාවේ කස්තුරී, ගොරෝචන, ඇතා දළ බිඳී පස්යන මෙම තුන් වර්ගය සොයා ගැනීම ඉතාමත් අපහසු කටයුත්තකි. යම් ආයතන දෙකකින් හෝ තුනකින් මෙම ද්‍රව්‍ය ඇසට පෙනෙන නොපෙනෙන තරමේ තරම් ප්‍රමාණයක් ඇතුළත් කර ඇත. එයද ඔබේ වාසනාවකි. නමුත් මේ ඖෂධ මංජුසාවක් මිලෙන් වැඩිය. රුපියල් 800ක වැනි මුදලකට මෙම
ඖෂධ මංජුසාව වෙළෙඳ‍පොළෙන් මිලදී ගන්නට පුළුවන. මුදල් ගරා ගැනීමේ වේතනාවෙන් නිදන් වස්තු නිෂ්පාදනය කරන අය වැඩිපුරම දකින්නට ලැබේ.

කෝණ බන්ධන යන්ත්‍ර. ආරක්ෂා බන්ධන යන්ත්‍ර ජීවන් කිරීමට පැය අටක පමණ කාලයක් ගතවේ. එම පූජාවට අවශ්‍ය ද්‍රව්‍ය සඳහා සෑහෙන මුදලක් වැයවේ. අද කා‍ලේ හැටියට මෙම යන්ත්‍ර දෙක ජීවම් කරගැනීමට පමණක් රුපියල් පහළොස් දහක් පමණ වැයවේ. එනම් 200කට 500කට 1000කට මිල කරන්නේ කෙසේ දැයි ඔබම සිතා බලන්න. කස්තුරි ශ්‍රී ලංකාවේ නැත. ඇත්තේ ඉන්දියාවේය. ඇත්දළ පස් වෙනුවට නිකන්ම පස්
ඖෂධ මංජුසාවට එන්නටද බැරි නැත. ඇතා දළ බිඳි පස් ගැනීමට නම් මහ වනයේ දින කීපයක් ගත කිරීමට සිදුවේ. මෙය ගත යුත්තේ හිලෑ අලියෙකුගෙන් නොව වල් අලියෙකු (පිට උඩ නොගිය) දළ ගැසූ තැනින්ය. ඉතාමත් භාරදූර කටයුත්තකි. ඔබට හැකිනම් මේ සියලු ද්‍රව්‍යයන් සොයාගෙන සිදුරු ඇති මැටි කළයක දමා අත්තිවාරමේ තැන්පත් කරන්න.

මෙම ඖෂධ මංජුසාව උඩක එල්ලීමෙන් මංජුසාවේ ඇති ඖෂධ එකට ගැටී කැකැරී නිකුත් වන ඖෂධ ගුණ නිවස පුරා පැතිරී යාමෙන් ලෙඩ දුක්, අමනුෂ්‍ය දෝෂ, ග්‍රහඅපල හා මිනිසාට අහිතකර විවිධ දේ නැතිවී සතුට සම්පත ළඟාවෙනු ඇත. නමුත් මෙම ඖෂධ මංජුසාව කළුගල්වලට හිරකර සිමෙන්ති දැමූ පසු එයින් නිකුත් වන්නේ මොනවාද? වාතය සමග කිසිම සම්බන්ධතාවක් නොමැති නිසා එහි ඇති ගුණය අවට විසිරී නොයයි. අපරාදේ ඔබ භූගත කළ යන්ත්‍රවල මුදල්. ටිකක් සිතා බලන්න ඔබ කළ යුතු වන්නේ මෙම ඖෂධ මංජුසාව වෙනුවට එම අවස්ථාවට කළුගලක් හොඳින් කහ දියරෙන් සෝදා තැන්පත් කිරීමයි. භූගත කරන යන්ත්‍රද ඇත. ඔබ ඔබට හරි යැයි සිතන දේ කරන්න.

ඖෂධ මංජුසාවේ තිබිය යුතු ද්‍රව්‍ය උඳු, මුං, තල, මෑ, වී, අගිල්, ගුගුල්, තුවරලා, රත්හඳුන්, සුදුහඳුන්, සැවැන්දරාමුල්. සමන්පිච්ච කැකුළු, ඊතණ, රත්මල් කැකුළු, එළ අබ, කජු ඇට, කුඹුරු ඇට, වැල්මී, වෙනිවැල්ගැට, මී ඇට, කොහොඹ අරටු, මුහුදු වැලි, දොළෙහි වැලි, ගඟේ වැලි, ඇළෙහි වැලි, ඇතා දළ බිඳි පස්, පර්වත පස්, කොහොඹ තෙල්, තැඹිලි තෙල්, මී තෙල්, ගිතෙල්, අබතෙල්, කැකුළු සහල්, රන්, රිදී, මුතු, මැණික්, කෝණ බන්ධන යන්ත්‍ර, ආරක්ෂා බන්ධන යන්ත්‍ර, නවරත්න, පස්ලෝ, දිය යට පිහිටි ගල්, මුහුදු කවඩි, මෙම ද්‍රව්‍ය සියල්ල අඩංගු විය යුතුයි. මගේ පාඨක ජනතාවට ඇතා දළ පස් මගෙන් (සීමිත පිරිසකට) නොමිලයේ ලබාගත හැකියි. ආරක්ෂා බන්ධන යන්ත්‍රය, කෝණ බන්ධන යන්ත්‍රය සාධාරණ මිලකට ලබාගත හැකියි.

නිවෙසකට මුල්ගල් තැබිමට අදාළ ක්‍රියාවලදී මේ අනුව කටයුතු කිරීම වැදගත්ය.

වාස්තු විද්‍යාඥ ලීලානන්ද රණවක
උපුටා ගැනීම ලක්බිම පුවත්පත



​සිංහල ලිපි

සතියේ ලග්න පලාපල