මේ ලස්සන රටට නැවතත් එනවා

views 2017-12-26 12:06:00 Sinhala_Article_New

තාරුණ්‍යය ජීවිතයේ සුන්දරතම අවධියයි. පාසල් වියෙන් අනතුරුව විවාහයෙන් කෙළවර වන තාරුණ්‍යය විටක ජීවිතයේ කෙළි­ෙලාල් දඟකාර වයසද වන්නේ ය. අලුත් දේ සිතන්නට අලුත් දේ කරන්නට පුංචි අදහසක් පහල වන්නේ නම් ඒ තාරුණ්‍යයේදීය. තාරුණ්‍යයට පිවිස අමරණීය විවාහයක් ජීවිතයේ සිහිවටනයක් කරගන්නට තරුණ සිත් පෙරුම් පුරන්නේ බොහෝ කාලයක සිටය. එවන් වූ සුන්දර අත්දැකීමක් වඩාත් සුන්දර වූ අවස්ථාවක් බවට පත්වූ රාජකීය විවාහ මංගල්‍ය උත්සවයක් පසුගියදා ලංකාවේ පැවැතියේ ශ්‍රී ලංකිකයන්ටද අමරණීය වූ සිත්තමක්ද සිතුවම් කරමිණි.

කොළඹ නගරයේ වූ කාර්යබහුලත්වය පෙරපරිද්දෙන්ම විය. වාහන පෙර පරිද්දෙන්ම එහා මෙහා දිවයන්නේ සුපුරුදු දින චර්යාවට පණ දෙමිනි. එහෙත් වෙනදා නොවූ අසිරියෙන් කොළඹ නගර සභා පිටිය අලංකාර වූයේ තවත් අලුත් යමකට මුල පුරමිනි. ධජ පතාක මැද මඟුල් බෙර වැයෙන්නට වූයේ දේශීය හෙළ සිරිතට පණ පොවමිනි. හේවිසි නාදයෙන්, මඟුල් බෙර මැද්දේන් සුයිනේ සුනියොන් සමඟත්, සුන්හයි හුආයි තරුණයා ලංවෑං සමඟත් අතිනත ගෙන ඉදිරියට පැමිණෙමින් තිබුණේ අපට ආගන්තුක නොවූ අපූරු මඟුල් ඇදුමකින් සැරසීගෙනය. ඔවුනට පිටුපසින් වැංගේ ඩොං නෙන්යු සමඟත් ක්යුසෙන්ලිංග් සෙනිංග් සමඟත් පැමිණියහ. ඔවුන්ට පිටුපසින් මෙවන් වූ තවත් චින ජාතික තරුණ තරුණියන් බොහෝ දෙනකු සිය සහකරුවන් සහකාරියන් සමඟින් විවාහප්‍රාප්ත විමේ අදහසින් පියවර තැබුවේ තවත් ලස්සන සැන්දෑවකට මුල පුරමිනි.

එදා සන්ධ්‍යාවේ නගර සභා පිටිය මෙසේ අලංකාරවත් වූයේ අපට ආගන්තුක වූ රාජකීය විවාහයකට සැරසෙමිනි. ලංකාවේ මින්පෙර මෙවන් රාජකීය විවාහයක් සිදු නොවූ නිසා මෙය ශ්‍රි ලාංකිකයන් වන අපට සුවිශේෂි මතක ගොන්නක් එක් කරන්නක් වූයේය.

අප රටේදී විවාහ වීමේ අපේක්ෂාවෙන් එදා කොළඹ ට පැමිණි මංගල යුවළ සංඛ්‍යාව 50කි. ඔවුන් සියලු දෙනාම හිරිමල් යොවුන් වියේ පසුවූවෝය. මෙහි විශේෂත්වය වූයේ ඒ සැම දෙනාම චීන ජාතික මනාල මනාලියන්වීමය. චීනයේ නැංජින්, ශැංහයි, ලියාඕනිංග් හා සුජියාන් වැනි විවිධ ප්‍රාන්තවලින් මෙන්ම ඈත ගම්වලින් පැමිණි මේ යෞවන යෞවනියන් සිය දෙනෙකු සිය ඥාතීන් පිරිවරා ගනිමින් මෙසේ දුරු රටකට පිය නැඟුවේ සිය විවාහ මංගල්‍යය හෙළ චාරිත්‍රානුකූලව අප රටේදී සිදු කිරීමටය.

“ මේක අපි දෙන්නගේ ජිවිතයේ සුවිශේෂිතම අවස්ථාව. අපි ලංකාව ගැන ලංකාවේ ලස්සන ගැන වගේම ලංකාවේ විවාහ සිරිත් විරිත් ගැන අහලා තිබුණා. ඒත් කවදාවත්ම ලංකාවට ඇවිල්ලා නැහැ. ඊයේ තමයි අපි දෙන්නත් අපේ නෑයනුත් ලංකාවට ආවේ. ලස්සන ලංකාවේ අපේ වෙඩින් එක ගන්න ලැබීම අපි දෙන්නගේ හීනයක් සැබෑවීමක් ” යනුවෙන් ෆැංහොන්ෂුයි හා ඇගේ සහකරු වන ලියුරොන්ග් සිය විවාහ ගිවිස ගැනීමේ උත්සවයේදි අප හා පැවසුවේ උතුරා යන සතුටිනි.

මේ රාජකීය විවාහය පැවැත්වූයේ කලක පටක් ශ්‍රි ලංකාවත් චීනයත් අතර වූ ඓතිහාසික සබඳතාව වඩාත් ශක්තිමත් කිරිමේ අරමුණ ඇතිවය. ලොව පැරැණිම ශිෂ්ටාචාරයක් උරුම කරගත් චිනය මානව සංහතියේ ප්‍රගමනය වෙනුවෙන් ලොවට දායාද කළ නිර්මාණයක් වන්නේ තිඹිරිගෙයයි. ක්‍රිස්තු වර්ෂ පස්වැනි සියවසේ සිට දෙරටේ මිතුදම පිළිබඳ විවිධ ලිඛිත සාක්ෂි හමුවුණත් ඉන් එහා ගිය මිතුදමකින් මේ දෙරට බැඳී පැවැතීම සුවිශේෂිය. මහනගර හා බස්නාහිර සංවර්ධන අමාත්‍යාංශයත්, සංචාරක ප්‍රවර්ධන හා ක්‍රිස්තියානි කටයුතු අමාත්‍යාංශය, සංචාරක ප්‍රවර්ධන කාර්යාංශය, වෝටර්ස් ඒජ් හෝටලය, චීන තානාතිපති කාර්යාලය මෙන්ම ග්‍රීන් ලීව්ස් ආයතනය එක්ව සංවිධානය කරන ලද මේ සුවිශේෂි මංගල දැක්මේ සංස්කෘතික අංශය මෙහෙයවූයේ ප්‍රවීණ නර්තනාචාරීණි රැජිණි සෙල්වනාගම් මහත්මියයි.

චීනයේ විවිධ ප්‍රාන්තවලින් පැමිණි මේ චීන ජාතික තරුණ තරුණියන්ගේ විවාහ උත්සව සියල්ල කෙරුණේ ශ්‍රි ලාංකික විවාහ සම්ප්‍රදායන්ට අනූකූලවය. අෂ්ටක ගායනා මැද පිරිත් පැන් වක්කරමින් බැඳි අතැඟිලි මෙන්ම ජයමංගල ගාථාවෙන් අලංකාර වු මේ මංගල්‍යය සැබැවින්ම සුවිශේෂි රාජකිය මංගල්‍යයක් විය. මේ මනාල යුවළ අතරින් කීප දෙනකු හැඳ සිටියේ ශ්‍රි ලාංකිය උඩරට මංගල ඇඳුමයි. ඔවුන් චීන ජාතිකයන් වුවද ඒ ඇඳුමට අපට ඔවුන් පෙනුණේ අපේ උඩරට මංගල යුවළ ලෙසය.

“ අපේ ජිවිතයේ ලොකු ආසාවක් තිබුණා ඔයගොල්ලන්ගේ රටේ සාරිය අඳින්න. මේ නිසා අපි අනිත් මනාලියන්ගෙන් සුවිශේෂි වුණා. ලංකාවේ සාරිය ඇඳලා ලංකාවේ විදියට ගත්තු මගේ විවාහය මගේ ජිවිතයේ වැදගත්ම සිදුවීමක්. මම සාරිය ඇන්දහම මගේ මහත්තයා මාව හරියට වර්ණනා කළා. ලංකාව ගොඩාක් ලස්සනයි. අපේ විවාහය වගේම අපේ මධුසමයක් ලංකාවේ ගත කරන්න ලැබුණු එක අපිට වාසනාවක් වුණා. ලංකාවේ අය හරීම හොඳයි. හොඳ ආගන්තුක සත්තාර තියෙන රටක්. අපි දෙන්නා අයිත් ලංකාවට එනවා.”එසේ පැවසුවේ සෙන්යුන් ය.

මෙම විවාහ උත්සවයේ සුවිශේෂි අවස්ථාවක් වුයේ රැජීනි සෙල්වනාගම් මහත්මිය විසින් සිය නර්තන කණ්ඩායම් යොදා ගනිමින් කළ සිදුකළ සංස්කෘතිකාංගයයි.

“ මේ විවාහ උත්සවයේ සියලූම නර්තනාංග ඉදිරිපත් කළේ මගේ චාමර කලායතනයේ දරුවන්. මෙහි මල් කුමරියන් 75ක් හිටියා. ඒ අයත් අපේ දරුවන්. ජයමංගල ගාථා දරුවන් 30 දෙනෙකු විසින් ඉදිරිපත් කළා. බොහෝ මනාලියන්ගේ ඇඳුම් ගෙනාවේ ඒ අයමයි. අපේ ඔසරියයි නිලමේ ඇඳුමයි ඇන්ද මනමාල මනමාලියෝ හරිම ආසාවෙන් හිටියේ. මේ රාජකීය මංගල්‍යය කළේ ලංකාවේ චාරිත්‍රවලට අනුව. ලංකාවේ විවාහ චාරිත්‍ර වාරිත්‍රවලට ඒ අය හරිම කැමැත්තක් දැක්වූවා. මේ තරුණ තරුණියන් සමඟ ඒ අයගේ ඥාතීන් 500 ක් ලංකාවට ආවා. ඒ හැමෝම අපේ ලස්සන සිරිත් අගය කළා. මෙය විචිත්‍රවත් විවාහ මංගල්‍යක් වුණා. ශ්‍රි ලාංකීය උඩරට පහතරට වගේම ලයන් නැටුම මෙන්ම චීන නැටුම් ද මෙහිදී ඉදිරිපත් කළා. මෙය රටවල් දෙකේ විචිත්‍රත්වය මුසුවුණු සංස්කෘතික

සම්මිශ්‍රණයක් සිදුවුණු මහා විවාහ මංගල්‍යයක්ද වුණා.” රැජිණි සෙල්වනායගම් මහත්මිය පවසන්නී ය.

චීනයත් සමඟ එකතුවී මෙම අලංකාර සංස්කෘතිකාංග මෙහෙයවීමේ පුරෝගාමීන් අතර ඇමැති පාඨලි චම්පික රණවක මහතා මෙන්ම ඇමැති ජෝන් අමරතුංග මහතාත් වෙති. එපමණක් නොව වෝටර්ස් ඒජ් ආයතනය මෙන්ම ග්‍රීන් ලීව්ස් ආයතනයද වෙයි. විදේශිකයෝ අපේ සිරිත් විරිත්වලට දැඩි ඇල්මක් දක්වති. ඔවුන්ගේ මෙන්ම හරබර ඉතිහාසයක් හා සංස්කෘතියක් උරුම වූ අප රට සමඟ පෑහෙන්නට ඔවුන් දක්වන්නේ ඊටත් වඩා ඇල්මකි. අද ශ්‍රි ලංකිය උරුමයන් දකින්නට වැඩිපුරම පැමිණෙන්නේ චින ජාතිකයන්ය.

ඉදිරියේදි මෙරටට පැමිණෙන විදේශිකයන්ට ශ්‍රි ලාංකීය උරුමයන් දැක ගැනීමට නර්ථනාචාරීනී රැජිණි සෙල්වනාගම් මහත්මියගේ මූලිකත්වයෙන් ‘ශ්‍රී ධරණි‘ නමින් සංස්කාතික මධ්‍යස්ථානයක් විවෘත වීමට ද නියමිතය. ඒ ග්‍රීන් ලිව්ස් ආයතනයේ මූලිකත්වයෙනි.

විවාහ මංග්‍යයෙන් අනතුරුව මේ මනාල යුවළ සියල්ලෝම අප රටේ සුන්දර ස්ථාන දැක බලා ගනිමින් රට පුරා සංචාරයේ යෙදුණහ. ඔවුන්ගේ දෙවැනි ගමන මංගල උත්සවය පළමු දිනයේ මෙන්ම අප රටේ සංස්කෘතික අංග මුල් කරගනිමින් ගල්කිස්ස මහ හෝටලයේදී පැවැත්විණි.

චීන තරුණ තරුණියන් සමඟ පැමිණ සිටි චීන ජාතික කාන්තාවක අපගේ ජාතික ගීය මුල සිට අගටම නිවැරැදිව ගායනා කිරීම මෙහිදී කැපී පෙනිණි. මෙම රාජකිය මංගල්‍යය හුදෙක් මංගල උලෙළක් පමණක් නොවන්නේ ඉන් අප රටට ලැබෙන ආර්ථික හා සමාජීය ඵල ප්‍රයෝජන බොහොමයක් නිසාය. මේ සියල්ලේම අපේක්ෂාව එළඹෙන හෙට දිනයේ රටට විදේශිකයින් ගෙන ඒමය.

​සිංහල ලිපි

සතියේ ලග්න පලාපල