හොර අංකවලින් දුවන යතුරුපැදි රට පුරා

0 Feb 03, 2017 09.06am Gossip

ලියාපදිංචි නොකර ව්‍යාජ අංක යොදාගෙන ධාවනය කෙරෙන යතුරුපැදි දහස් ගණනක් ඇති බවට මෝටර් රථ ප්‍රවාහන කොමසාරිස් දෙපාර්තමේන්තුව සහ පොලිසිය මඟින් අනාවරණය කර ගෙන ඇති අතර එම යතුරුපැදි සියල්ල ඉදිරියේ දී ලියාපදිංචි කරවීමට පියවර ගෙන තිබේ. ඒ සඳහා කැබිනට් අනුමැතිය ලබාගැනීම ද සිදුවෙමින් පවතී.

මෝටර් රථ ප්‍රවාහන කොමසාරිස් ජෙනරාල් ජගත් චන්ද්‍රසිරි මහතා ප්‍රකාශ කළේ මේ යතුරුපැදි යොදාගෙන සිදු කෙරෙන විවිධ අපරාධ සහ මාර්ග අනතුරු නිසා ආරක්ෂාව හේතුකොටගෙන කැබිනට් අනුමැතිය මත එම යතුරුපැදි ලියාපදිංචි කිරීමට තීරණය කර ඇති බවයි.

විශේෂයෙන් විදෙස් රටවලින් ‍යතුරු පැදි අමතර කොටස් තීරුබදු නොගෙවා හොර රහසේ ආනයනය කර යතුරුපැදි සකස් කර අලෙවි කිරීමත් යතුරු පැදි විශාල ප්‍රමාණයක් ව්‍යාජ අංක යොදාගෙන ධාවනය කිරීමත් සිදු වෙයි.

දැනට හඳුනාගෙන ඇති ආකාරයට මාර්ග අනතුරු අතරින් වැඩිම ප්‍රමාණයක් යතුරුපැදි මූලික කොටගෙන සිදු වෙයි.

ඒ අනුව මෙම වාහන පදවන්නන්ට එරෙහිව කිසිදු නීත්‍යානුකූල ක්‍රියාමාර්ගයක් නොගන්නා අතර ඒවා අදාළ ගාස්තු අය කර හිමිකරුගේ නමට ලියාපදිංචි කිරීම සිදු වෙයි.

මේ අතර කාලයක් තිස්සේ හිමිකරුගේ නමට වාහන පැවරුම් කර නොගත් පුද්ගලයන්ට සහන කාලයක් තුළ වාහන පැවරුම් කර ගැනීම සිදු විය. එම තුන්ම‍ස් කාලය තුළ වාහන ලක්ෂයකට වැඩි පිරිසක් පැවරුම් කර ගෙන තිබුණි.

එම සහන කාලය තුළ පැවරීම් කර ගැනීමට නොහැකි වු තවත් විශාල පිරිසක් සිටින බව අනාවරණය වී ඇත. අයදුම්කරුවන්ගේ ඉල්ලීම් සලකා බලා ඉදිරියේදී යළි එම වාහන පැවරුම් කර ගැනීම සඳහා අවස්ථාවක් ලබාදීමට යෝජනාවක් ලැබී ඇති බවද මෝටර් රථ ප්‍රවාහන කොමසාරිස් ජෙනරාල්වරයා පැවසීය. එම කාලයේ අයඳුම්කරුවන් විසින් බාර දෙනු ලැබූ එම පැවරුම් අයඳුම්පත්වල කටයුතු මේ වන විට ආරම්භ කර තිබේ.

සතියේ දින පහ තුළ එම නිලධාරීන්ට අදාළ කටයුතු සිදු කර අවසන් කළ නොහැකි නිසා සතියේ නිවාඩු දින සහ සෙනසුරාදා ඉරිදා දිනවලද වැඩ කර එම පැවරුම් කටයුතු කඩිනමින් අවසන් කර හිමිකරුවන් වෙත වාහන පොත් ලබාදීමටද පියවර ගෙන තිබේ.

මෝටර් රථ ප්‍රවාහන කොමසාරිස් ජෙනරාල් ජගත් චන්ද්‍රසිරි මහතා පෙරේදා (1) එම දෙපාර්තමේන්තුවේදී පැවැති මාධ්‍ය හමුවකදී මෙම කරුණු අනාවරණය කෙළේය.

ඒ මහතා පවසා සිටියේ දෙපාර්තමේන්තුවේ කටයුතු මනා ලෙස සැකසුරුවම් කරමින් මහජනතාවට කඩිනම් සේවාවක් ඉටුකර දීම සඳහා ආරම්භ කළ වැඩපිළිවෙළ සාර්ථක ප්‍රතිඵල ලබාදෙමින් සිටින බවය.

ඒ යටතේ තෙවැනි පාර්ශ්වයක පිහිට යටතේ ඔවුන්ට මුදල් දී අදාළ දෙපාර්තමේන්තු කටයුතු සිදු කර ගැනීමට උත්සාහ කරන පුද්ගලයන් දැනුවත් කිරීමේ ප්‍රතිඵලයක් ‍වශයෙන් තැරැව්කරුවන්ට හසුවන පිරිස බෙහෙවින් අඩු වී ඇත. ඒ සම්බන්ධව ලැබෙන පැමිණිලි ද අඩු වී තිබේ.

නව තාක්ෂණය යොදා ගනිමින් අයදුම්කරුවන්ට විවිධ රාජකාරී කඩිනමින් කරදීම මේ වන විට සිදුවෙයි. ඒ අනුව වාහනයක් ලියාපදිංචි කිරීමේදී අයදුම්පත බාරදීමෙන් පසු වාහන අංකය ලබාදීම ඇතුළු කටයුතු දුරකථන කෙටි පණිවුඩ ක්‍රමය ඔස්සේ දැනුම්දීම ආදිය ද මේ වන විට ආරම්භ කර තිබේ.

වැරදි සිදු කරන රියැදුරන්ගේ රියැදුරු බලපත්‍රයට අනුකූලතා ලකුණු අඩු කිරීමේ ක්‍රියාවලියද මේ වසරේ සිට ක්‍රියාත්මක වෙයි
(දිනමිණ පුවත්පත ඇසුරෙනි)

පුවත්

Recent Post